上个星期证券商协会同港交所(00388)新任主席周松岗食晚饭,由于系周主席上场后第一次同华资经纪组织聚会,故部分媒体形容呢次系｢破冰｣饭局｡
坦白讲,过去几年,交易所领导真系好少好少同华资经纪坐埋倾吓｡难得有此机会,我当然唔放过｡我同周主席讲,香港唔单止中小经纪日子难捱,就连中小型上市公司都无运行｡
原因系牛熊证等衍生工具,将大市变成为赌场;由于市场扭曲了,故以前较受散户欢迎嘅二､三线股都门庭冷落,无人留意自然运用唔到资本市场去集资｡长此下去,实非港股之福!
衍生工具对香港嘅祸害,我讲过无数咁多次｡民建联于去年底,以问卷调查方式访问了112人,其中有八16人表示曾买卖牛熊证,而曾经买卖过牛熊证嘅受访者中,有近六成损手｡
香港散户特别多,外国一套不合宜
我同周主席讲,香港股票市场有自己嘅独特情况,同世界其他金融城市相比,我哋散户特别多,故外国嗰套面向基金及专业投资者的营管方式,并唔完全适合香港市场,若硬要套入嚟,蚀底嘅一定系香港市民｡
做得交易所主席,一定系叻人｡我期望周主席要多了解民情,如果可以好似候任特首梁振英咁,揸支笔攞张凳落区踩入股票行,听吓民意睇吓事实,咁就真系有Heart,｢破冰｣指日可待｡《中润证券有限公司主席 陈葆心》